Jan 01.15

മാലിന്യം തള്ളുന്നവരെ പിടിക്കാന്‍ പാപ്പിനിശ്ശേരിയില്‍ സി.പി.എമ്മിന്റെ രാത്രികാവല്‍

പാപ്പിനിശ്ശേരി പഞ്ചായത്തിനെ മാലിന്യമുക്തമാക്കാന്‍ ഒരുവര്‍ഷം നീണ്ടുനില്ക്കുന്ന കര്‍മപദ്ധതി സി.പി.എം. പ്രഖ്യാപിച്ചു. പദ്ധതിയുടെ ഭാഗമായി പാപ്പിനിശ്ശേരി ദേശീയപാതയില്‍ ജനവരി ഒന്നുമുതല്‍ പാര്‍ട്ടി േവാളന്റിയര്‍മാരുടെ രാത്രികാലകാവലും ഏര്‍പ്പെടുത്തിയിട്ടുണ്ടെന്ന് നേതാക്കള്‍ പത്രസമ്മേളനത്തില്‍ വിശദീകരിച്ചു. ദേശീയ പാതയ്ക്കരികിലും പൊതുസ്ഥലങ്ങളിലും വീടുകളിലും ഉണ്ടാകുന്ന മാലിന്യങ്ങള്‍ ശാസ്ത്രീയമായി സംസ്‌കരിക്കുന്നതിനും അജൈവ മാലിന്യങ്ങള്‍ ശേഖരിച്ച് സംസ്‌കരണകേന്ദ്രങ്ങളില്‍ എത്തിക്കുന്നതിനും പദ്ധതികള്‍ തയ്യാറാക്കും. പാര്‍ട്ടിയുടെ വിവിധ ഘടകങ്ങള്‍, മറ്റ് സംഘടനകളുടെ സഹായത്തോടെ 2015 ജനവരി ഒന്നുമുതല്‍ 2015 ഡിസംബര്‍ 31 വരെ നീണ്ടുനില്ക്കുന്ന മാലിന്യനിര്‍മാര്‍ജന യജ്ഞത്തിനാണ് നേതൃത്വം നല്കുക. പഞ്ചായത്ത് തലത്തില്‍ വാര്‍ഡ്തല സെമിനാറുകള്‍ പൂര്‍ത്തിയാക്കി. അഞ്ചുദിവസം നീണ്ടുനില്ക്കുന്ന വാര്‍ഡ്തലത്തിലെ പ്രചാരണ പ്രവര്‍ത്തനങ്ങള്‍ ജനവരി ഒന്നിന് സമാപിച്ചു. ഗാര്‍ഹികമാലിന്യങ്ങള്‍ ഉറവിടങ്ങളില്‍ത്തന്നെ സംസ്‌കരിക്കുന്നതിനുള്ള ശക്തമായ ഇടപെടലുകള്‍ പാര്‍ട്ടിതലത്തില്‍ നടത്തും. ഇതിനാവശ്യമായ സഹായങ്ങള്‍ നല്കുന്നതിന് പഞ്ചായത്ത് അധികൃതരില്‍ സമ്മര്‍ദം ചെലുത്താനും തീരുമാനിച്ചിട്ടുണ്ട്.

Jan 01.15

സ്‌കൂളുകളില്‍ മൊകേരി രാജീവ്ഗാന്ധി

കണ്ണൂര്‍ റവന്യൂജില്ലാ കലോത്സവത്തില്‍ കണ്ണൂര്‍ നോര്‍ത്ത് ഉപജില്ല ചാമ്പ്യന്‍മാര്‍. എതിരാളികളെ ബഹുദൂരം പിറകിലാക്കിയാണ് എച്ച്.എസ്. വിഭാഗത്തില്‍ 334 പോയിന്റും എച്ച്.എസ്.എസ്. വിഭാഗത്തില്‍ 373 പോയിന്റും നേടി കണ്ണൂര്‍ നോര്‍ത്ത് തിളക്കമാര്‍ന്ന വിജയം നേടിയത്. സ്‌കൂളുകളില്‍ മൊകേരി രാജീവ്ഗാന്ധിസ്മാരക എച്ച്.എസ്.എസ്. ചാമ്പ്യന്‍ പട്ടമണിഞ്ഞു. എച്ച്.എസ്സില്‍ 139 പോയിന്റും എച്ച്.എസ്.എസ്സില്‍ 134 പോയിന്റും സ്‌കൂള്‍ നേടി. യു.പി. വിഭാഗത്തില്‍ മാടായി ഉപജില്ലയാണ് ജേതാക്കള്‍ (148 പോയിന്റ്). യു.പി. വിഭാഗം സ്‌കൂളുകളില്‍ സെന്റ് തെരേസാസിനാണ് വിജയം (65 പോയിന്റ്). എച്ച്.എസ്.എസ്. വിഭാഗത്തില്‍ പയ്യന്നൂര്‍ 321 പോയിന്റ് നേടി രണ്ടും ഇരിട്ടി 319 പോയിന്റ് നേടി മൂന്നും സ്ഥാനം നേടി. എച്ച്.എസ്.എസ്. വിഭാഗം വിദ്യാലയങ്ങളില്‍ സെന്റ് തെരേസാസ് കണ്ണൂരാണ് രണ്ടാംസ്ഥാനത്ത് (122 പോയിന്റ്). മൂന്നാം സ്ഥാനം ജി.എച്ച്.എസ്.എസ്. കൂത്തുപറമ്പ് കരസ്ഥമാക്കി (108 പോയിന്റ്). എച്ച്.എസ്. വിഭാഗത്തില്‍ കണ്ണൂര്‍ സൗത്ത്, പയ്യന്നൂര്‍ എന്നിവര്‍ രണ്ടും മൂന്നും സ്ഥാനത്താണ് (യഥാക്രമം 299-298 പോയിന്റുകള്‍) എച്ച്.എസ്. വിഭാഗം വിദ്യാലയങ്ങളില്‍ സെന്റ് തേരെസാസ് രണ്ടും (133 പോയിന്റ്) തലശ്ശേരി സേക്രഡ് ഹാര്‍ട്ട് മൂന്നും (120 പോയിന്റ്) സ്ഥാനങ്ങള്‍ നേടി.

Jan 01.15

കണ്ണൂരില്‍ ക്വാറി ഓഫീസിന് നേരെ മാവോവാദി ആക്രമണം

കണ്ണൂരിലെ നെടുംപൊയിലില്‍ ക്വാറി ഓഫീസിന് നേരെ മാവോവാദി ആക്രമണം. പുലര്‍ച്ചെ മൂന്നുമണിക്കാണ് ആക്രമണം ഉണ്ടായത്. പേരാവൂര്‍ 34ാം മൈലില്‍ പ്രവര്‍ത്തിക്കുന്ന ന്യൂ ഭാരത് സ്‌റ്റോണ്‍ ക്രഷറിന്റെ ഓഫീസ് ആയുധധാരികള്‍ അടിച്ചുതകര്‍ത്തു. പൊലീസെത്തി അന്വേഷണം ആരംഭിച്ചു. അഞ്ചംഗ സംഘം പട്ടാള യൂണിഫോമിലെത്തിയാണ് ആക്രമണം നടത്തിയത്. ഇവര്‍ മാവോവാദി അനുകൂല മുദ്രാവാക്യങ്ങള്‍ വിളിച്ചാണ് എത്തിയത്. സെക്യൂരിറ്റി ജീവനക്കാരെ ആദ്യം ബന്ധിയാക്കി. ആക്രമണത്തിന് ശേഷം ഓഫിസില്‍ സ്ഥാപിച്ചിരുന്ന സിസിടിവി ക്യാമറകള്‍ കവര്‍ന്നു.

Jan 01.15

മനോജ് വധം: സിബിഐ രണ്ടു പേരെ കൂടി അറസ്റ്റ് ചെയ്തു

ആര്‍എസ്എസ് നേതാവ് കിഴക്കെ കതിരൂരിലെ മനോജിനെ വെട്ടിക്കൊലപ്പെടുത്തിയ കേസില്‍ സിപിഎം പ്രവര്‍ത്തകരായ രണ്ടു പ്രതികളെ കൂടി സിബിഐ അറസ്റ്റ് ചെയ്തു. 15 ാം പ്രതി കിഴക്കെകതിരൂര്‍ ബ്രഹ്മാവ് മുക്കിലെ കണ്ണോത്ത് ഹൗസില്‍ മനോജ്, 16 ാം പ്രതി കിഴക്കെകതിരൂര്‍ ബ്രഹ്മാവ് മുക്കിലെ മീത്തലെ വലിയോത്ത് സാബിത്ത് (29) എന്നിവരാണ് അറസ്റ്റിലായത്. ഇന്നലെ തലശേരി റസ്റ്റ്് ഹൗസില്‍ വച്ച് ചോദ്യം ചെയ്യലിനു ശേഷമാണ് ഇവരുടെ അറസ്റ്റ് രേഖപ്പെടുത്തിയത്. ഇതോടെ മനോജ് വധക്കേസില്‍ ഇതുവരെ അറസ്റ്റിലായവരുടെ എണ്ണം 17 ആയി. ക്രൈംബ്രാഞ്ച് ജില്ലാ സെഷന്‍സ് കോടതിയില്‍ സമര്‍പ്പിച്ച 19 പേരടങ്ങുന്ന പ്രതിപട്ടികയില്‍പ്പെട്ട രണ്ടു പേര്‍ മാത്രമാണ് ഇനി അറസ്റ്റിലാകാനുള്ളത്. 11 ാം പ്രതി പത്രജീവനക്കാരന്‍ തളിപ്പറമ്പ് ചപ്പാരപ്പടവ് തടിക്കടവ് മണിക്കല്‍ വീട്ടില്‍ കൃഷ്ണന്‍ അരപ്പയില്‍ (44), 12 ാം പ്രതി കിഴക്കെ കതിരൂര്‍ പുത്തലത്ത് പൊയില്‍ വീട്ടില്‍ എ.രാമചന്ദ്രന്‍ എന്ന രാമന്‍ (54) എന്നിവരാണ് ഇനി പിടിയിലാകാനുള്ളത്. കഴിഞ്ഞ സെപ്റ്റംബര്‍ ഒന്നിന് കിഴക്കെ കതിരൂരില്‍ വച്ചാണു മനോജ് കൊല്ലപ്പെട്ടത്. സിപിഎമ്മിന്റെ പ്രാദേശിക നേതാക്കളും പ്രവര്‍ത്തകരുമാണ് പ്രതികള്‍.

Jan 01.15

ബിജെപിക്കെതിരേ സിപിഎമ്മും എസ്ഡിപിഐയും ഒന്നിക്കുന്നു: പി.കെ. കൃഷ്ണദാസ്

പൊതുശത്രുവായ ബിജെപിയെ ഇല്ലാതാക്കാന്‍ സിപിഎം ജില്ലാ സെക്രട്ടറി പി. ജയരാജന്‍ തീവ്രവാദ സംഘടനയായ എസ്ഡിപിഐയിലെ സംസ്ഥാന-ജില്ലാ നേതൃത്വവുമായി ചര്‍ച്ച നടത്തിയതായി ബിജെപി ദേശീയ നിര്‍വാഹകസമിതി അംഗം പി.കെ. കൃഷ്ണദാസ് ആരോപിച്ചു. ഹിന്ദുത്വ പാര്‍ട്ടിയായ ബിജെപിയെ തകര്‍ക്കാന്‍ അവരുടെ ശത്രുക്കളായ സിപിഎമ്മും എസ്ഡിപിഐയും യോജിച്ച് പ്രവര്‍ത്തിക്കുകയാണ്. മാര്‍ക്‌സിസ്റ്റ് ഭീകരതയ്‌ക്കെതിരേ പ്രവര്‍ത്തിക്കാനും ജീവിക്കാനുമുള്ള സ്വാതന്ത്ര്യത്തിനായി ബിജെപിയുടെ നേതൃത്വത്തില്‍ സ്റ്റേഡിയം കോര്‍ണറില്‍ സംഘടിപ്പിച്ച ദിനരാത്ര സത്യഗ്രഹം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബിജെപി-ആര്‍എസ്എസ് നേതൃത്വത്തിനെതിരേ അക്രമം നടത്താന്‍ പണം കണ്ടെത്തുന്നതിനായി സിപിഎം നേതാക്കള്‍ മാസംതോറും ഗള്‍ഫില്‍ പോയി പണം പിരിക്കുകയാണ്. ഇക്കാര്യം കേന്ദ്ര-സംസ്ഥാന അന്വേഷണ ഏജന്‍സികള്‍ അന്വേഷിക്കാന്‍ തയാറായാല്‍ തെളിവുകള്‍ നല്കാന്‍ ബിജെപി നേതൃത്വം തയാറാണെന്നും കൃഷ്ണദാസ് പറഞ്ഞു. നാലുവര്‍ഷത്തെ ഇടവേളക്ക് ശേഷം സംസ്ഥാന സെക്രട്ടറി പിണറായി വിജയന്റെ ജന്മദേശത്ത് വച്ച് ബിജെപി അനുഭാവിയായ സുരേഷിനെയും ഒരു മാസത്തിനകം കിഴക്കെ കതിരൂരിലെ മനോജിനെയും വെട്ടിക്കൊലപ്പെടുത്തിയാണ് ജില്ലയില്‍ വീണ്ടും അറുകൊലക്ക് സിപിഎം തുടക്കം കുറിച്ചത്. കഴിഞ്ഞ മൂന്നുമാസത്തിനിടയില്‍ ഏകപക്ഷീയമായ 68 അക്രമങ്ങളാണ് ബിജെപി പ്രവര്‍ത്തകര്‍ക്കും അവരുടെ വീടുകള്‍ക്കും സ്ഥാപനങ്ങള്‍ക്കുംനേരേയുണ്ടായത്. സിപിഎം നേരിടുന്ന രൂക്ഷമായ പ്രതിസന്ധി മറച്ചുവയ്ക്കാന്‍ രക്തസാക്ഷികളെ സൃഷ്ടിക്കാനുള്ള ആസൂത്രിതമായ ശ്രമമാണ് നേതാക്കളുടെ മണ്ഡലങ്ങളില്‍ നടക്കുന്നതെന്നും കൃഷ്ണദാസ് പറഞ്ഞു. മറ്റു ജില്ലകളില്‍ നിന്ന് വ്യത്യസ്തമായി കണ്ണൂരിലെ പാര്‍ട്ടി ഒറ്റക്കെട്ടാണെന്നു പറഞ്ഞിരുന്നുവെങ്കിലും ഇപ്പോള്‍ ജില്ലാ സെക്രട്ടറിയും അദ്ദേഹത്തിനെതിരായ ഗ്രൂപ്പിന്റെയും പോരാട്ടമാണ് പാര്‍ട്ടിക്കകത്ത് നടക്കുന്നത്. ജില്ലയില്‍ ഇപ്പോള്‍ നടക്കുന്ന അക്രമങ്ങളേക്കാള്‍ വലിയ ഗൂഢാലോചനക്ക് പാര്‍ട്ടി തയാറെടുക്കുകയാണ്. എന്നാല്‍ ബിജെപിയുടെ ചെലവില്‍ രക്തസാക്ഷികളെ സൃഷ്ടിക്കാമെന്ന സിപിഎം അജണ്ട നടപ്പാക്കാന്‍ അനുവദിക്കില്ലെന്നും കൃഷ്ണദാസ് പറഞ്ഞു. ബിജെപി ജില്ലാ പ്രസിഡന്റ് കെ. രഞ്ജിത്ത് അധ്യക്ഷത വഹിച്ചു. പി.കെ. വേലായുധന്‍, കെ. സത്യപ്രകാശന്‍, പി. രത്‌നാകരന്‍, മോഹനന്‍ മാനന്തേരി, എ.പി. ഗംഗാധരന്‍ എന്നിവര്‍ പ്രസംഗിച്ചു. ദിനരാത്ര സത്യഗ്രഹത്തില്‍ കാവുമ്പായി സമരസേനാനി രയരപ്പന്‍ നമ്പ്യാരുടെ മകള്‍ പുഷ്പയുടെ സാന്നിധ്യം ഏറെ ശ്രദ്ധേയമായി.